城中鏡：陳君宜卡通食店逆市發圍
市道唔好，有人選擇避風頭，有人就選擇逆市發展。富商鄭躬明太太陳君宜（Qinnie）腦筋轉數快，佢就無懼逆市出招，繼早前經營蛋黃哥點心店獲利後，又有新創意，打算推出全新卡通人物「酸比頭」嘅主題菜式，下月仲會邀請作者來港試菜，屆時仲可以同粉絲見面，兼且乘機宣傳一番。
陳君宜嘅創意食品大受歡迎，佢打算再下一城。
食物配上卡通，在飲食業淡市下都殺出一條血路。
Qinnie話：「之前蛋黃哥主題點心，淨係一間店，做七個月，每日生意額達十一萬，月賺三百萬，做到唔想停。」睇準呢條路，Qinnie半年前已經開始搜羅各式卡通角色資料，熟讀相關故事內容，結果揀定前述嘅新主題，佢話：「呢個家族有成百幾隻精靈，我揀咗其中十幾隻，每隻都有自己嘅特性，日本仲出咗本書，教人點去捕捉精靈，日本啲小朋友信晒，以為真。」佢話特別鍾意其中兩隻精靈，一隻個樣似足佢老公，另一隻肥嘟嘟極可愛嘅就好似佢囝囝喎。
