本土思潮來勢洶洶，繼公民黨（公文袋）嗱嗱聲借《十周年宣言》靠攏本土之後，民主黨（白鴿黨）亦擬趕本土尾班車，遲吓將會草擬「決議文」回應本土思潮，負責草擬嘅副主席羅健熙承認，該黨黨綱未能配合社會發展，所以用「決議文」嘅方式守護本土價值，但底線係絕唔支持港獨同暴力。羅健熙臨急臨忙爬上本土列車，揸唔揸得穩都唔知喎。
白鴿黨尋日先由中常委區諾軒喺港大論壇上放風，指兩星期前集思會已決定草擬一份「決議文」，回應時代挑戰，「決議文」內容共兩部分，包括本土論述同一國兩制，以及政改如何推進等，亦會涉及泛民如何與中央溝通，該文經由黨大會投票，五月再對外公布。據講，由於修改黨綱嘅門檻太高，所以佢哋決定用「決議文」方式回應本土問題，但咁樣做絕唔係因為公文袋有《十周年宣言》而人有我有。
有白鴿黨中人曾經批評公文袋嘅《十周年宣言》「沒有內涵，搔不到癢處」，又指內容空洞，都是「口水嘢」。羅健熙強調白鴿黨唔會新瓶舊酒，至少「決議文」唔再講對民主回歸嘅想像，而係分析回歸後得失，再由現實睇一國兩制如何走下去。佢又相信，支持本土派嘅人只係少數，該黨追求民主嘅方式仲有一定支持。
第一手消息請下載on.cc東網
