政壇：范國威推黨友做炮灰
俗稱「超級區議會」嘅立法會區議會第二功能界別合共有五席，更被視為政治含金量最高，泛民同建制派都爭崩頭，互不相讓兼鬥餐死。
其中泛民陣營方面，范國威等人當年反對超級區議會而退出白鴿黨，因而催生成立新民主同盟，最近更不惜今日嘅我打倒昨日嘅我，積極考慮派人出戰超級議席，但據聞范國威經過一輪十五十六後，決定留守新界東，寧可推黨友、知名度差一大截嘅大埔區議員關永業做炮灰出選超級議席，關永業會唔會慘敗而回，答案似乎不言而喻喇！
落區易拉架早張揚
新同盟本身有十五名區議員，幾乎可以自行推舉一人出戰超級議席，但基於當年成立時係反對超級議席，加上票源相近嘅立會前議員鄭家富一度考慮「再作馮婦」再次披甲上陣，因此新同盟對於係咪立場急轉彎，都有一番思想掙扎，而黨內認為一旦要出選，知名度最高嘅范國威係不二之選，屆時新東一席就要搵黨友頂上。
不過，政治一日都嫌長，最近先有票源相近嘅前議員決定唔復出參選，政圈隨即有風聲傳出范國威傾向留番喺新東，由關永業頂上出選超級議席，有分析指范國威始終留喺新東勝算較大，競選所需資源亦較少，而關永業由後備變為正選亦有迹可尋，事關新同盟近日落區時，唔少易拉架已事先張揚，「你是否贊成新民主同盟派出大埔區議員關永業競逐超區議席」，擺明為關上陣鋪路。
資料顯示，關永業早喺一九九九年已當選區議員，四度連任至今逾十六年，但對比范國威，知名度仲係差咗一截，加上選超級議席起碼要幾百萬元，如果最後真係搵佢出選超區，一方面要睇係咪入到閘，若然成功入閘，外界亦對佢能否勝出當選存疑，更認為范國威此舉，難免予人推黨友入火坑，自己就捨難取易，喺新東連任機會甚濃，係咪符合政治倫理，就留待大家自行判斷嘞！
