城中鏡：慢遊滬樂園
話說上海迪士尼樂園喺六月中開幕，最近掀起一陣撲飛熱潮，而另一邊廂，籌備多年嘅日本北海道新幹線亦喺日前通車，政商界名人會唔會心郁郁跳出香港去體驗一番？太子珠寶鐘錶主席鄧鉅明話有意試坐北海道新幹線，但唔會急於一時，而外號「快勞夾大王」嘅杜振源透露，兩個月後會再抱孫，因此計劃等埋佢出世先齊齊去新主題樂園玩喎。
杜振源（右）兩個月後再抱孫，左為鄧慶治。
鄧鉅明話兒子上年開始少咗去主題樂園。
韋國洪上個月做完白內障手術，現時唔使戴眼鏡都睇得好清楚。
尋日係一連四日復活節假期嘅最後一日，喺沙田馬場見到唔少名人，當中唔少人都好鍾意外遊同埋試新嘢，對於今年中開幕嘅上海迪士尼樂園，鄧鉅明就話兒子之前好鍾意去香港嘅主題樂園，自己亦覺得樂園入面睇煙花特別靚，不過兒子依家可能大個咗，上年開始就冇乜興趣去，加上預料內地所有城市嘅人均會湧去上海新嘅主題樂園開幕，因此暫時都冇意同人逼咁話。
鄧鉅明又話完全唔需要擔心上海嘅主題樂園搶香港生意，因為大家特色唔一樣，但佢認同香港可以再發掘多一、兩個有特色嘅大型旅遊景點。
韋國洪術後冇近視
同場仲有國際文具集團主席兼行政總裁杜振源同小母牛香港籌款委員會成員鄧慶治。杜振源話以前唔會去主題樂園，但自從有咗孫女後就不時一齊去，依家仲擁有全年通行證。當問及會唔會同鄧慶治一家人組團去日本坐北海道新幹線，杜振源話可能五月先成行喎。
冇戴眼鏡一改平時「四眼」look嘅沙田區議會前主席韋國洪，尋日亦有現身馬場。韋國洪透露，早排喺六樓廂房望落沙圈屏幕，睇唔清楚啲賠率同數字，笑言「登六」後對眼唔好，醫生叫佢做白內障手術，手術後依家連近視都冇埋，睇嘢唔使戴眼鏡都好清楚。
