政壇：愛女撐泛民 何君堯冇符
屯門區議員何君堯自從舊年十月獲委任為嶺南大學校董後，多次同嶺大學生代表，包括嶺大學生會會長劉振琳等人同場激辯駁火，但何君堯自言，嶺大校董身份其實冇乜壓力，反而因為政見唔同，對前年曾參與佔領行動嘅愛女冇晒符。
何君堯（左）自言對愛女冇晒符，反而出任嶺大校董冇乜壓力。（資料圖片）
何君堯透露屋企成屋都係「女人」，除咗兩個仔喺外國發展，自己同太太、女兒、兩個女傭同三隻狗女同住，笑言身為全屋唯一男丁反而成為弱勢，不過要數到最煩惱，就係因為政見唔同，近年同愛女少咗溝通。佢解釋，愛女就讀本地大學，同好多大學生一樣都係泛民支持者，前年更曾參與佔領行動，其政見同自己自然南轅北轍。
佢又為自己被指言論惹火解畫，自言有時面對學生或者出席公開活動會表現真性情，亦唔介意學生冇禮貌、講粗口，只係有失佢哋自己身份。佢強調大家講佢冇所謂，但如果涉及其他人，包括家人，一定會企出來發聲喎。
