政壇：搞搞政：工黨頻頻撈過界 老將扮激博曝光
喺多個年輕本土派同傘後組織嘅威脅下，多個傳統泛民黨派都加速年輕化，唯獨工黨喺九月立法會參選名單依舊由現有三名老將擔頭。其中何秀蘭已年過六十，李卓人同張超雄亦已年屆五十九歲，難以獲取年輕選民嘅支持。最近該黨頻頻「撈過界」，喺多個非勞工議題上搏盡扮激，反映佢哋都開始感受到「被消失」嘅危機。
工黨主打勞工同基層議題，主席李卓人長期兼任支聯會領導層，副主席張超雄則致力協助新移民，被一眾右翼年輕網民視為「左膠」同「大中華膠」。工黨講本土議題就輸畀公文袋，講激進又輸畀另一左翼政黨社民連，同一眾主張港獨同勇武抗爭嘅年輕本土派及傘後組織，更加係完全冇得比。
「打尖」提覆核
最近該黨似乎想改變形象，首先係立會財委會喺一片混亂中通過高鐵追加撥款後，人民力量同公文袋先後表明會提出司法覆核，其中人力更預告最快會喺本月十八日入稟，但工黨搶閘喺早一日派執委鄭司律，就有關司法覆核申請法援。雖然鄭聲稱係以個人身份提出覆核，但該黨多名老將當日都做晒「攝石人」，全程陪住鄭司律上法援署填表爭曝光，「打尖」都打得肉酸過人。
之後教育局局長吳克儉出席一間位於天水圍嘅中學活動，離開時突遭上百名該校學生、舊生同校外人士圍堵。初時以為事件係由本土派團體發動，但其後鄭司律上電台自爆佢亦在場，強調抗議行動係由學生同舊生自發策劃，而佢正係該校舊生，所以同政黨無關喎！
到近日天水圍「泥頭山」事件，一向關注有關問題嘅土地正義聯盟到場挖泥抗議，最稀奇係關注開骨灰龕問題嘅工黨成員謝世傑亦有參與，李卓人更喺警察嚟晒後先到場，令人質疑兩人撈過界抽水博拉。恨見報恨成咁，睇嚟真係有好大危機感。
