相傳北宋有個綽號「三隻手」嘅匪幫首領，為門徒定下「三不偷」嘅規矩，一不偷忠臣義士，二不偷貧寒人家，三不偷良家婦女。違者會被逐出山門，呢啲咪就係盜亦有道囉。可惜吖，時移勢易，人心不古，早就冇呢支歌仔唱咯。

呢，就講近年來營商手法備受詬病嘅健身中心吖，有立法會議員踢爆，舊年至今共接獲十五宗涉款超過一百萬港元嘅投訴個案，當中好多涉及輕度智力障礙、特殊學習障礙以及其他精神病患者。其中一宗個案係咁嘅，一名患有自閉症嘅十八歲男子，舊年喺一間連鎖健身中心職員游說下，簽咗六萬多元會籍。咁都未算最狼，中心職員聲稱可以為事主安排參加泰拳比賽，為咗收取三萬蚊嘅所謂「報名費」，不惜帶佢去財務公司借錢，直至兩個月後財仔追數，事主父親至如夢初醒，雖然後來立法會議員同消委會介入，但都只能夠成功追回部分款項咋。

另一單畸士仲誇張。一名三十多歲女精神病患者，被同一間連鎖健身中心職員以免費試玩利誘到健身中心，隨即被至少四名職員連續疲勞轟炸四小時，結果要簽下長達七年共二萬多元嘅合約至甩到身。你哋話嘞，連殘障人士都唔放過，仲有冇再無良啲吖。

話時話，部分健身中心專揀老弱傷殘甚至行為能力不足者埋手，已經係公開嘅秘密，除咗議員收投訴收到手軟，自《商品說明條例》一三年實施至今，海關接獲嘅相關投訴亦多達五十幾宗，但就從來未聽過有人被定罪。講到呢度，大家應該明喇，無良健身中心明呃智障人士，咪就係因為當局有法不依，關人個關囉。偷呃拐騙零成本咯喎，啲奸商唔變本加厲大發昧心財，又點對得住官老爺暗中偏幫吖。

講真，要保障弱勢群體，話都冇咁易，爭在當局做唔做嘅啫。正如有人建議，只要為預繳式消費實施冷靜期，消費者簽約後一段時間內可以無條件退款，咪唔使怕畀人圍囉。仲有吖，消委會最近同部分健身中心簽訂協議，容許行為能力不足人士獲無條件解約，港府點解唔將有關做法制度化，並且推廣至所有類型合約呢？

記得有前高官曾經講過「無商不奸」，計太一叮話齋，如果唔係庸官縱容姑息，奸商又點會有機可乘吖。香港話就話係自由市場，睇真啲，消費陷阱處處，防不勝防，早淪為詐騙自由嘅市場喇，叮！