政壇：張國柱博大霧搲加薪
公立醫院高級醫生額外加薪風波啱啱暫告一段落，社福界即刻傳出想搭順風車嘅聲音，立法會社福界議員張國柱尋日話，要去信政府爭取加薪，並要求政府撥款喎，如果政府堅持不加薪，業界亦會採取合理行動。佢係咪暗示社福界高層又要靜坐一番呢？有人就話，出年就係立法會換屆選舉之年，呢啲借政府財力為自己加分嘅事睇怕陸續有來。
張國柱話，喺現時整筆撥款機制下，符合資格額外加薪百分之三嘅社福機構高層職員有二十幾人，預計政府額外支出唔會超過二百萬元。佢強調，人數同金額雖然唔大，但呢個係原則問題，非政府機構職員應該跟隨公務員薪酬調整機制，所以應該爭取到底。其實，過往一直有社福機構投訴薪酬偏低，尤其係社會福利署四年前向社福機構推行整筆撥款制度後，有機構甚至明目張膽扣起社署用作員工增薪嘅撥款做儲備，因而令社福界內非常不滿，更大鬧肥上瘦下，今次受益人係高層，前線員工會點睇呢？真係諗諗都覺得好微妙。
社福界撥款早已落實
唔知張國柱係咪見到醫生成功爭取加薪，所以博大霧聯同社聯喺今個星期內去信勞工及福利局局長張建宗，反映加薪要求。但醫管局醫生爭取加薪，最少都有好多醫生連日靜坐，而且最後係由醫管局方面出錢，冇破壞原本嘅機制，但張國柱喺社福界提相似要求，就只見佢喺度大講原則，而受影響嘅人卻影都冇，而且社福界唔同機構都有睇住盤數嘅人，今次亦唔見佢哋回應件事呢？
雖然係咁，張國柱繼續靠嚇，話相信政府會吸取醫生加薪嘅經驗，處理好社福界嘅訴求。之但係，社福界嘅撥款早已落實，如果任由額外加薪風繼續刮落去，恐怕好多同公共服務掛鈎嘅界別都會有異動，唔想順得哥情失嫂意，政府真係要諗清諗楚。
