政壇：搞搞政：林煥光借古諷今 撐學生造反有理
多間大學湧現廢除特首校監必然制、檢討校董組成方法嘅訴求，有學生更圍堵會議室阻止校董會議進行，風雨欲來，已沉寂一輪嘅行政會議召集人林煥光（WK）尋日到中文大學出席講座，對超過一千名大學生大談「造反有理」，佢話，領袖管治不可像古代皇帝咁嚴苛，否則必定「死硬」。佢喺講座上大講一宗商船叛變事件，但有學生質疑WK借故事批評特首梁振英嘅管治，佢否認借古諷今、批評現今政局。不過，佢本身就係管治團隊一員，食碗面、反碗底，最終兩頭唔討好！
WK以「一七八九年豐裕號商船叛變事件：造反有理？」為題，分析當年英國商船前往大溪地進行任務回航時發生嘅叛變事件。佢話船員上岸五個月後紀律鬆散，但艦長着重紀律，急功求成，要加快航程，經常向船員用劄刑。最後副手帶頭造反控制商船，把艦長和其跟隨者共十九人趕離商船，副手將商船駛至無人島過新生活，但其後在島上再爆發矛盾和衝突，最終副手亦死於非命。有關故事更被拍成電影《叛艦喋血記》。
與政府唱反調早有前科
佢用呢個故事話畀大家聽，冇共識嘅團體，冇人會有好結果，不過，現場好多人都質疑佢係咪諷刺政局？中大政治與行政學系蔡子強相信，WK準備此故事為大學生分享定必有其意思，只係WK驚會惹來批評才矢口否認。WK同政府唱反調或對着幹唔係第一次，二○一三年佢做平等機會委員會主席時，曾要求特首在施政報告提出如何保障不同性傾向人士免受歧視。而同年發生的免費電視發牌風波，WK亦批評政府做法與市民期望落差過大，建議特首需要深切檢討。
