政壇：王石講中港矛盾 要互相體諒

今年六十四歲嘅王石話，死神曾經搵過佢兩次，而且兩次都係登珠峰。二○○三年，五十二歲嘅佢第一次闖珠峰，竟然氧氣筒缺氧，要靠意志登頂，仲要執攀山遇難者用剩嘅氧氣筒嚟用，先撐住落到山，呢次佢亦創咗中國登珠峰最年長紀錄。第二次喺佢五十九歲，呢次因為缺氧，搞到對眼短暫失明，摸黑咁落山。佢嘅體會係「就是因為怕死才要登山，面對它才學會珍惜生命」。

佢本來打算七十歲再登珠峰，不過四年前佢返學堂讀書，去完哈佛去劍橋，依家就喺牛津讀緊有關機械人嘅嘢。佢覺得知識山峰仲難攀過物理山峰，所以依家專心挑戰知識嗰個。

講到中港矛盾，王石話明白香港人感受，但希望雙方可以互相理解。講起多年前初次嚟香港，王石搭的士時飲完汽水，順手開窗就扔個罐出街，司機嬲到幾乎罷駛，仲因而兩人嗌交。當時王石唔覺得有問題，心諗內地個個都係咁(O架)啦。今日佢梗係已經戒咗呢個習慣，佢話呢個係社會文化問題，以前內地經濟唔太好，有啲現象係可以理解嘅。