城中鏡：黃士心雙喜臨門
前晚快活谷有夜馬賽事，康泰旅行社創辦人黃士心（Jackie）現身撐愛駒，睇嚟心情唔錯。佢自爆十二月份屋企雙喜臨門，除咗兒子黃進達（Jason）太太即將分娩，佢升呢做爺爺之外，Jackie嘅二十八歲愛女亦即將結婚，未來女婿來自醫生世家，Jackie對呢門親事都覺得好滿意。咁啱十二月底旅遊業議會改選，若被視為主席大熱人選嘅Jason順利當選，咁咪喜上加喜？
黃士心（左）升呢做爺爺喜上眉梢，好友陳國強都戥佢開心。
潘偉業（左起）及鄺晶晶即將添B，閨蜜莊菲娜及楊華勇夫婦笑稱亦「籌備緊」生第三胎。
張德祥夫婦（前左及右）、張宗豪（後左）及張宗琪（後右）齊入馬場撐愛駒。
Jackie讚Jason好乖仔，佢冇逼阿仔及新抱添孫，但係咁快黃家有得開枝散葉，梗係開心晒。依家囡囡仲搵到好歸宿，佢放晒心嘞！有添B之喜嘅仲有做威發國際執董潘偉業（Albert）及太太鄺晶晶（Akiko）。已育有一名一歲半囡囡嘅Akiko話，呢胎都係女，佢鍾意女仔多啲，所以好開心。但佢笑住「投訴」話，早前幫腹中BB照4D動態立體超聲波，結果細女同家姐一樣似足Albert，唔似佢喎。
張宗豪研推出訂造BB衫
度身訂造品牌詩閣董事總經理張德祥同太太范元芳、兒子張宗豪（Lincoln）及姪仔張宗琪（Tony）都有入場湊熱鬧，Tony仲着上自家設計嘅中西合璧外套現身，好有型。Lincoln話，五年前佢嘅大仔出世時，專登為囝囝訂造BB衫及口水肩，仲繡埋名，自此便為添丁嘅朋友訂造貼心賀禮，個個都好鍾意。一旦時機成熟，佢打算推出呢個尊貴BB衫系列喎，咁Jason就快啲排定隊嘞。
