醫局虛招紓人龍 小修小補難治本

嗱，港府早前發表檢討醫管局報告，為本港公共醫療體系把脈，事隔多月，醫管局終於作出回應，日前公布行動計劃，提出十大建議共一百二十四項措施，主打縮短專科門診及急症室輪候時間，包括由家庭醫學專科門診分擔骨科專科門診嘅穩定個案、推出手機APP畀新症病人跨網預約，以及透過制訂門診服務量等表現指標，監察個別醫院有冇服務爆煲。行動計劃又劍指聯網山頭主義，要求醫院行政總監每三至六年輪調一次，打擊山寨王文化，而受訓駐院醫生亦會由總部中央遴選委員會招聘，防止地區擁兵自重。

老實講，醫管局管理不善，服務每況愈下，早就應該改革喇。好似專科門診咁，求診個案不斷堆積，輪候時間愈來愈長，病人隨時錯過醫治時機，冇事變有事，小病變大病，大病變冇命。急症室更加淪為「慢症室」，唔少病人等咗幾十粒鐘都未能上房，甚至有人「等到死」添，簡直係草菅人命。公共醫院千瘡百孔，家陣至嚟補鑊，仲有冇遲啲吖。

再講喇，醫管局管理層出名庸碌無能，藥方能唔能夠對症下藥，仲要睇過至知。學病人組織話齋，公共醫院之所以輪候時間長，根源在於醫護人手不足，無法應付服務需求，呢個問題唔解決，就算推出乜嘢措施都係嘥氣嘅咋。好似推出手機跨網預約咁，如果病人睇醫生又係大排長龍等餐死，有乜分別呢？又好似轉介骨科病人咁，如果前線醫護七個蓋冚十個煲嘅困局無法打破，對改善服務有乜幫助呢？講到尾，前線醫護短缺係整個公共醫療體系嘅主要病源之一，一日呢個問題解決唔到，醫療亂象就無法根治！

話時話，醫護人手問題已經存在好多年，究竟港產官僚幾時至肯認真拆彈呢？咪話太一叮唔提醒，前線醫護短缺唔止造成服務效率下降，更加經常釀成醫療事故，甚至搞出人命，唔講得笑。

無論點都好，喺人手問題未解決之前，醫護人員最緊要緊守崗位，做好本分，如果加人工先至識得爭取，服務就唔識改善，咁就講唔通喇，叮！