上星期二開始，港股連升四日，整個星期恒指累積升252點，收報22,965點，但主板日均成交額529億元，卻反而比前星期的568億元少。

內房股高息撲水情況愈演愈烈，將對股價產生不良影響。（資料圖片）

太陽日誌

綜合大行預測新中業績（港元）

四月時大市曾以過千億成交慶祝滬港通消息，筆者早已幾次指出，絕非係一般散戶參與。基金高位摸頂，再到五月初認錯，狂質獲利股套現離場，到近日大市乾升，指數重返上次高位，可見股市這片英雄地，確係專收叻仔。在下無水晶球，無法預知今次能否返到滬港通後高位甚至更高水平，近日大市成交偏淡，既可以看成乾升，亦可以睇成沽壓唔大。但可肯定的是基金手頭現金比例高，只等中國調控政策大方向轉變的催化劑出現。

高息撲水情況惡化

「五一」假期內地樓市銷情慘淡，全國樓市庫存激增，發展商降價促銷壓力愈來愈大，而官方公布的四月全國70大城市樓價可見，大部分地區按月都出現跌幅。上周市傳住建部容許除北京、上海、深圳及廣州等一線城市外的30多個地方城市調整限購令措施，儘管消息之後被澄清，但炒家唔理三七廿一，趁勢炒咗至算。上周五中國海外（00688）升5.4%、碧桂園（02007）升4.8%、雅居樂（03383）升4.3%、潤地（01109）升3.9%。

內房股近月累積跌幅驚人，故藉利好消息反彈唔出奇。但由近期內房企業發債的條件所見，較側重公司中長線基本因素及償債能力的債券商，給予內房企業的風險溢價不斷上升，例如碧桂園早前發5.5億美元五年期優先票據，利率7.875厘，比去年發十年期票據的7.5厘還要高，世茂房地產（00813）及龍湖（00960）也有類似情況。

新中私有化唔睇好

一三年內房發展商銷售創歷史紀錄，但卻未有好好把握時機減債，今年樓市吹淡風，庫存上升的同時，資金壓力亦愈來愈大，如果政府樓市調控的大方向堅定不變，可以估計未來幾個月，內房股高息撲水情況會愈演愈烈，對股價產生不良影響。

講開內房股，下個月中新世界中國（00917）將開股東會，就是否接納新世界發展（00017）提出每股6.8元私有化的建議投票。理論上，揸25億股的街外股東，只要有一成投反對票，私有化就要告吹，唔係好穩陣。但在下本來就認定，是次私有化醉翁之意不在酒，新世界供股先係主菜。上星期私有化通函顯示，新中重估後的價值，令私有化作價由溢價變折讓，夠晒戲劇性。個人估計，新中步恒盛（00845）私有化失敗後塵的機會唔細。

睇番今年新中累升70%，同期潤地跌20%及中海跌8.2%，如果股東投反對票，基本消費，相信股價都要跌番到5至5.5元之間。有胡唔食罪大惡極，揸住的小股東，都係無謂貪果幾毫子，進取的甚至可以諗諗沽空新中。