Fundman睇市：華晨 仍具上升空間

美國可能提早退市，阿布扎比皇室成員旗下基金及蘇黎世保險兩個外資，分別沽售手上的重農行（03618）以及新華保險（01336）；加上十一月滙豐中國製造業PMI縮番至50.4，比前月跌0.5百分點，綜合以上各種因素，近幾個交易日經歷過千點升幅的港股，尋日埋單淨係隊得120點，個人認為真係跌得少，也證明短線大市未必可以回補周初的上升裂口，好讓大家有買平貨的機會。

內銀難脫上落格局

看官如果心水清，可能留意到近日筆者只提過券商股以及內險股等，但就無提周一狂升的內銀股。查實，三中全會推動金融業進一步改革，主打係利率市場化，對銀行業，尤其係壟斷的四大行不利，怪就怪在周初基金掃到癲晒。到底係基金唔理三七廿一，總之成交同市值夠大就補咗倉底先，抑或有其他原因？個人則認為是前者可能性居多，加埋連向來多買少賣的阿布扎比皇室都出貨，看來內銀仍是「上落市專用」一類。

尋日話境外熱錢流入加快，要睇實人仔升值受惠股，三隻飛機股隨即抽高超過9%，但都及唔上米蘭站（01150）誇張，一升就八成一。呢間上市僅兩年半之公司，唔知大家仲記唔記得佢係本地魚缸史上最勁超購王，打住個人遊受惠股招牌，當年超額認購達2,180倍。但自掛牌初見過2.93元，比招股價1.67元高75%之後，幾乎無段好睇，證明超購倍數同公司質素無直接關係。

大市焦點繼續移向非三中全會受惠股，中汽協公布十月內地汽車單月銷量按年上升24%，比首十個月累積的14%升幅大，除經銷商庫存減少之外，車價折扣亦有收窄的迹象，在無補貼下，零售需求比估計來得更加強勁，加埋第三季業績已優於預期，車股近月強勢應可延續。

SUV（多用途車）近月銷情稍優於房車，長城汽車（02333）有新型號H8登場，可優先考慮，華晨（01114）第三季業績因R&D費用延後入帳而大幅超過市場預期，股價十月底見14.66元高位後，近日在10日線浮沉以消化升幅，昨成交回升股價未郁，但若突破13.5元，應該仲有一浸行。