政府年初推出新辣招「波及」商業市場後，已有唔少投資者轉投海外物業。劉Sir八到，本港老牌家族培新集團亦將「戰線」伸延至英國，好似倫敦同埋曼徹斯特兩個商業項目，就用咗合共約1.94億英鎊買入（折合約24.2億港元），都算係本港近年比較大手嘅海外物業投資。

吳美綺稱，培新集團看好英國物業市場未來會有良好增長。

近期本港機構或投資者購買英國物業情況

近期不少投資者轉投英國物業市場。（資料圖片）

目前樓市受到多項辣招掣肘，投資本地物業市場愈嚟愈難搞，海外物業市場成為另一出路。培新集團業務經理吳美綺同劉Sir呻，依家針對樓市嘅措施愈嚟愈多，舊樓收購比以前難做，要考慮成本效益同風險等因素，而土地招標通常都由大型發展商投得，發展新項目嘅渠道變得好狹窄。

麗景酒店擬全幢售

吳美綺話，集團今年初開始將業務拓展到英國，都係屬於商業發展，好似倫敦牛津街有個翻新項目，集團就用咗約1.22億英鎊買入；而位於曼徹斯特市中心區嘅娛樂中心，就大概投資約7,200萬英鎊。而集團仲入股當地建築商Hadley作投資。

至於旗下尖沙咀麗景酒店啱價就會考慮全幢出售，佢承認早兩年有財團以近30億港元全幢洽購，不過拒絕咗，佢雖唔排除酒店有機會全幢出售，但就話近排中環美利大廈活化項目成交價咁好，加上臨海酒店罕有，最少都值40億元。

劉Sir發現，今年多咗投資者購買英國物業投資。好似金管局近排確認外匯基金直接投資海外物業，與倫敦發展商聯營發展梅費爾區嘅漢諾威廣場，金管局實際參與投資都有近12.6億港元。又如資深投資者黎永滔，近月都用咗超過9億港元，買入英國倫敦牛津街全幢商用物業。

上水項目投資十億

另外，培新集團嚟緊喺上水會有新發展項目，吳美綺話，旗下「上水匯Spot！」商場係集團首個純商業發展，投資額近10億港元，總樓面約15萬方呎，當中約5萬方呎食肆樓面已經全數租出，平均呎租約40多至60多元，目前整體出租率約四成多。至於零售樓面意向呎租就約100多元，去到最多近300元。

呢個商場預期今年底至明年初落成，最快明年中可以試業，估計商場租罄可帶來每月共約700萬元租金收益。