袁振寧（右）呻旅行社生意難做。左為袁太林藹欣。
呢排日圓貶值，令港人遊日興致勃勃，斷估旅行社生意應該唔錯，但早前我哋喺一個活動上見到縱橫遊執行董事CN袁振寧，佢就呻話生意難做，事關網上銷售平台當道，加上廉價航空機位不停增加，令業界經營利潤愈來愈薄，實情係「有人頭冇饅頭」至真喎。
CN話過往旅行社可以喺旅遊淡季時賺少啲，旺季時賺多啲拉上補下，但今時今日的遊戲規則經已唔同晒。現時銷售機票及酒店的網上平台愈來愈多，令到價格好透明，競爭激烈，對傳統旅行社業務影響好大。
咁仲未夠，廉價航空嘅興起對業界衝擊亦好大，因為市民可以直接同航空公司買機票，唔使再經過旅行社，加上廉航機位不斷增加，以日本線為例，過去一年廉航機位數目勁增四倍。講到咁慘，CN話未來惟有積極開拓大陸客市場，希望將個餅做大啲望有肉食喎。
第一手消息請下載on.cc東網
