政壇：搞搞政：骨幹等拉瀕分裂 公文袋面臨瓦解

警方最近就佔領行動展開第二波拘捕行動，好似公文袋黨魁「袋巾傑」梁家傑、「大內總管」陳家洛同前議員陳淑莊咁，都係首輪拘捕名單，早前已接獲警方通知，有可能以煽動及組織非法集會等罪名拘捕佢哋，其中陳淑莊尋日下午已正式被警方拘捕。如果告得入上述罪名，幾位公文袋骨幹成員分分鐘要坐監。原本被視為該黨接班人嘅陳淑莊，重返立會嘅願望亦隨時落空。唔單止咁，有傳公文袋主席余若薇會出現喺第二輪拘捕名單上，即係一眾黨員唔係等拉就係可能等坐監。

白鴿黨有望執死雞

其實政改亦令該黨內部分歧進一步浮上水面，好似郭家麒、湯家驊同郭榮鏗過往喺上海政改之行各走各路，已足見黨內毫無隊形可言；而早前泛民撐黃傘行動，郭、湯更全程失蹤，某程度上已表明取態。較遲入黨嘅郭家麒為保新界西選區票倉，更只埋首新界區議題，儼如獨孤城。至於唯一女將毛孟靜，早已盛傳同陳家洛冇偈傾，近年更改行「本土」路線，唔講仲以為新民主同盟范國威先係佢黨友。

不過，最樂見公文袋分裂或瓦解嘅，相信莫過於白鴿黨。白鴿黨喺佔領期間進退失據，行得太前就被人鬧激進，又因為絕迹金鐘，又冇參與佔中三子同學聯等會面而被人鬧爆。不過，隨着公文袋、工黨等主要死敵陸續被拉，冇核心人物參與佔領嘅白鴿黨有望執死雞，名副其實坐享漁人之利。