馮家強喺本月履新，接任教協總幹事。
教協前任總幹事何小玲去世後，經歷兩年時間嘅招聘，空缺終由年僅三十五歲、曾任學聯秘書長同綠色和平東亞分部管理層嘅馮家強接任。教協話委任馮家強可為教協注入新血，讓年輕一代接手會務，期望佢上任後可加強對教育政策嘅研究同處理年輕老師薪酬待遇等議題。
馮家強尋日見傳媒時指出，過去十多年一直專注國際性嘅環保議題，但留意到近年本港喺社會發展上有好多唔同嘅意見，出現分化，所以舊年決定應徵教協總幹事，冀團結教育界同社會。佢又話未來會專注教研工作、處理縮班同年輕老師薪酬待遇等議題。咁佢加入教協後，係咪會走較激進方向？佢就話教協作為工會，會以會員嘅決定為依歸，唔會因個別人事變動而改變。
教協會長馮偉華就話基於防止滲透等考慮，喺招聘總幹事時較審慎，所以花咗兩年先物色到合適人選。佢又話教協職員唔少已有一定年紀，相信馮家強能為教協注入新血，引入更多創意同新思維，期望馮家強利用其豐富嘅人事同管理經驗，協助教協未來發展。
第一手消息請下載on.cc東網
