（設計圖片及對白）
雖然立法會秘書處只係處理立法會內部事務，但隨住議員要求愈來愈高，加上佢哋所有事情都政治化，搞到秘書處成日被人擺上枱。唔知係咪因為呢個原因，再加上部分喺秘書處工作多年嘅職員相繼退休，令秘書處流失大量人手之餘，仲要面對青黃不接嘅問題，睇嚟立法會秘書長陳維安今次真係有排煩。
話說法律事務部第一把交椅法律顧問馬耀添將會喺年中退休，副秘書長林鄭寶玲亦會喺差唔多時間退休。秘書處尋日宣布，經過大半年嘅招聘工作後，決定委任現任高級助理法律顧問馮秀娟為新法律顧問。行政管理委員會之前因馬耀添退休而成立法律顧問招聘小組，仲搵嚟獵頭公司物色新任法律顧問人選，但最終都睇唔啱，要由內部晉升算數。
擬將副秘常設化
雖然馬耀添個位終於搵到接任人，但據聞林鄭寶玲個位仲未物色到合適人選。雖然喺好多年前，秘書處係有副秘書長呢個職位，但回歸後已取消呢個安排。不過，經過林鄭寶玲後，秘書處有意將副秘書長呢個位常設化，由現任四位助理秘書長入面其中一位接任。但由於四人中有兩位都係新人，搞到秘書處喺揀人方面都有啲頭痕。
秘書處流失多位猛將，但尋日仍有大班同事趁下午開例行會議，特別為陳維安慶祝踏入五十歲知命之年。話說當立法會主席曾鈺成行入會議室後，幾個管事推住一個插有蠟燭嘅蛋糕進入會議室，原來秘書處班職員知道陳維安生日，於是夾計買個蛋糕幫佢慶祝，畀個驚喜佢。
陳維安話過咗半百之年，生日願望一定係身體健康，又希望秘書處咁多位職員可以開開心心上班，快快樂樂返屋企，唔使做得咁辛苦喎。
第一手消息請下載on.cc東網
