劉展灝（左六）話內地市場可成為香港玩具商一條新出路。（互聯網圖片）
有人話女人錢最難賺，但原來細路仔生意亦係爭崩頭。偉易達尋日發盈警，話今年三月底止嘅財政年度收入同毛利率難達預期，兩樣數據都會微跌，最主要原因係以歐美市場為主嘅兒童教育平板電腦銷情唔掂。生意難做咗，工總就建議港商可以諗諗大陸市場，實行外銷轉玩內銷。
其實偉易達喺中期業績已經提過兒童教育板腦市況艱難，雖然盈警通告無話競爭來自邊度，但總之兒童板腦嘅庫存比預期高，競爭相當激烈，消息仲拖累埋尋日股價跌8%，報105.8蚊。
業內人士覺得歐美兒童市場收縮係最大問題，基於華人家庭最重視子女教育，香港工業總會主席劉展灝就建議，內地市場可以為香港玩具商提供一條新出路。佢話係就係歐美市場經濟復甦，歐美需求平穩，但係增幅唔明顯。工總建議港商可以諗諗大陸市場，實行「出口轉內銷」博一博。
玩具廠商會常務顧問楊子江更樂觀咁講，內地喺十年內會成為最大玩具市場之一，消費力同需求增長快，而人均消費會因為內地中產階層擴大同埋平均人工上升帶動。佢估計，十年內嘅玩具消費會追近美國。
第一手消息請下載on.cc東網
