泛民主派一邊反對小圈子選舉，一邊又對俗稱「超級議席」嘅立法會區議會（二）功能界別議席趨之若鶩，真係自打嘴巴。今年九月舉行嘅立法會換屆選舉，多個泛民黨派均覬覦超級議席，鬥到火紅火綠，老中青、不同黨派就算「鬼打鬼」都再所不惜添。
經去年底區議會選舉後，只有泛民大黨先有十五名區議員聯署支持嘅門檻資格，依家泛民佔三席超級議席，民主黨（白鴿黨）佔兩席，民協有一席。有指白鴿黨方面，除涂謹申繼續落場參選外，元朗區議員鄺俊宇都係大熱，但青年民協主席何啟明亦可能出戰，連當年反對超級議席嘅新民主同盟都可能派立法會議員范國威出選，今次真係有排爭喇。
此外，仲有知名度較高嘅街工梁耀忠，但佢暫時只得五張區議員提名票，據聞佢正向其他泛民黨派、甚至八名傘兵借提名入閘。提名戰都咁多動作，遲吓大家上晒擂台，真係有大把好戲睇囉。
第一手消息請下載on.cc東網
