斬樹黨大小通殺 土沉香瀕臨絕種

即係咁，斬樹黨非法砍伐已經夠離譜，家陣幾乎連樹苗都唔肯放過，更加令人忍無可忍。以前香港有唔少逾百年樹齡嘅土沉香，喺斬樹黨嘅屠刀之下，已經接近絕迹，斬樹黨見斬無可斬，居然連樹齡十年以下、直徑僅手掌闊嘅BB樹都照斬，問你怕未。

正如環保人士話齋，近四年被斬嘅土沉香超過一千棵，估計全港健全土沉香得番一百棵，睇見都心翳。十年樹木，百年樹人，土沉香樹最少十年至能夠成材，斬樹黨大小通殺，遲早搞到絕子絕孫。

其實，斬樹黨愈來愈猖獗，非法砍伐已經唔係一朝一夕嘅事，照計當局早就應該採取措施保護土沉香至係，可惜事實啱啱相反，港產官僚一直闊佬懶理，卒之咪搞到土沉香買少見少囉。好似漁護署咁吖，話就話會加派人手巡邏，其中大埔滘自然護理區仲設有檢查站添，似模似樣，係威係勢，點知得個睇字，該區咪一樣成為土沉香砍伐重災區。斬樹黨直情當漁護署冇到，可見官僚幾咁無能。

警方亦唔好得幾多嘅咋，有村民投訴曾親眼撞破斬樹黨劈樹，又發現疑似賊竇，點知警方經常推三推四，藉口多多，唔係關人個關，就係賊過興兵，唔怪得斬樹黨有恃無恐喇。其實，斬樹黨遍地開花，除咗偷香之外，亦衍生其他罪案，搞到村民人人自危，提心吊膽，而警方居然懶得執法，你話係咪不負責任吖。

當然啦，砍伐土沉香涉及跨境犯罪，淨係靠本港執法係唔夠嘅，最重要係兩地執法部門應該加強合作，先至可以阻嚇斬樹黨。可惜吖，班官老爺講就天下無敵，做就有心無力，而且好似四方木咁唔踢唔郁，土沉香有乜法子唔絕種吖。

所以話，官僚靠得住，豬乸會上樹。有班熱心行山友自組沉香保衞隊，除咗行山時留意土沉香嘅情況及協助清除斬樹黨留低嘅記號，而且製作「土沉香地圖」，監察土沉香安危，為保護大自然出心出力，絕對值得一讚。今時今日，東南亞及內地嘅土沉香已經幾近絕迹，本港可以講係野生土沉香最後一片樂土，如果港府繼續闊佬懶理，土沉香好快就會完全滅絕，睇怕下一代只能喺書本上憑弔咯，叮！