政壇：選舉近范太寸CY突軟化

港府早前宣布將具爭議性嘅《二○一四年版權（修訂）條例草案》「作罷」，又主動順應泛民主派要求，調動立法會嘅法案同撥款審議優先次序，被指管治態度明顯軟化。全國人大常委范徐麗泰尋日接受電台訪問時，拒絕揣測特首梁振英係咪應中央要求轉變，但佢認為隨着下屆特首選舉臨近，港府自然須考慮政策嘅受歡迎程度。

范太續稱，一向希望手中有權嘅政府，能夠謙虛溫和聽意見。問及今次轉變係咪真心，佢就話好難一下子判斷，強調唔會因為一、兩句說話或者一、兩件事，就決定支持某人做特首，因為「做騷」係一時嘅，做人先係長久嘅。

范太又預期，隨着立法會選舉臨近，議會抗爭手法將愈趨激烈，估計選舉後會有年輕激進派進身議會，威脅舊有激進派嘅議席，政府可能要面對全面不合作嘅立法會，管治更見困難。