政壇：楊位醒蔬菜做SPA除農藥
前稱「香港食品業總會」嘅香港食品委員會早前舉行成立三十二周年晚宴，仲首次頒發「百年食品品牌」獎項予十二個歷史悠久嘅百年老店，數百位城中食品業界人士齊見證開心一刻。該會會長陳建年話香港食品一向有質優價廉同安全可靠優勢，今年將續辦多項活動，推動本土食品發展同國際合作。
楊位醒（左起）、黃光輝同李遠康齊分享飲食健康之道。
陳建年（後）讚李文達（前左）係業界榜樣，前右為李文達妻。
早前消費者委員會高調關注蔬菜殘留除害劑同肉類使用抗生素問題，業界點應變？做酒樓生意嘅香港餐務管理協會主席楊位醒話，佢哋唔止擔心蔬菜殘留農藥，連沙泥洗唔乾淨都隨時畀客投訴，故依家一般酒樓都有新做法，就係用「啤水機」洗菜，不停打氣入去製造漩渦反覆清洗，好似幫蔬菜做SPA咁，兼可提高水分含氧量，令蔬菜更加青綠添！
身兼香港餐飲聯業協會主席嘅翠華集團老闆李遠康話，佢哋依足世界衞生組織標準採購肉類食品，所以市民可放心食用。同場仲有獲頒「卓越成就獎」嘅李錦記集團主席李文達、中華出入口商會會長張學修同常董彭楚夫等人。
