鄭寶鴻非常熟悉上世紀中上環著名食肆所在位置。
好多人對飲食都非常講究，但隨着時代改變，飲食文化同從前大有不同，好多傳統懷舊食品已經失傳。香港歷史博物館名譽顧問鄭寶鴻話以前廚師慢工出細貨，每間茶樓嘅點心都各有特色，煮個生炒糯米飯，真係一路灑水一路炒。依家事事講效率，乜都要快，點心款式千篇一律，歎茶嗰種閒情逸致，亦不復見。
黎偉鴻話飲食業界請人艱難，年輕人寧願去紮鐵都唔入行。
《老港滋味》出版人陳植漢（左）同胡珠分享香港「滋味」掌故。
中華廚藝學院早前搵來一班飲食界老行尊，集結香港唔同年代飲食掌故，撰寫成《老港滋味》一書。當中歷史專家鄭寶鴻對飲食亦有一番研究，仲清楚記得上世紀中上環著名食肆所在位置。佢話以前除咗「星期美點」外，每間茶樓都有自己風格嘅點心。以第一茶樓嘅「雞絲粉包」為例，用新鮮雞肉及蝦餃皮製，包成一個銀包咁款，好睇又好食。
環境污染 鮮味不再
佢又話以前嘅雲吞麵，真係用大地魚同鮮蝦熬湯，依家就以味精取代，食唔番舊時嗰種味道。至於昔日成行成市嘅「大牌檔」，雖然依家搬晒上市政大廈，但佢話都有好處，衞生得嚟一樣可以有「鑊氣」，只係部分人覺得冇風味啫！
新光集團創辦人胡珠就慨嘆，食材除咗受西方影響外，以前季節性嘅食物，經基因改造後，一年四季都可食到，但其屬性及食療價值就因此唔同咗。而環境污染亦令食物質素下降，同一種魚類都可能冇以前咁鮮味。另外熊掌、娃娃魚等被禁後更加難再嘗到。
同場仲有剛結束北角總店生意、米芝蓮食肆大廚黎偉鴻，佢慨嘆業界缺乏新血，年輕人寧願紮鐵都唔做廚師，而好多後生仔學廚純粹當拍拖或消遣，學完冇心做，搞到佢要無所不用其極招聘人手。好似佢其中一個得力助手，就係嚟佢度取外賣時，見對方有禮貌，立即單刀直入挖角。
第一手消息請下載on.cc東網
