消費信心跌谷底 香港前景一片灰

有調查數據為證o架。香港城市大學聯同多間大學就兩岸四地消費者信心調查顯示，本港消費者信心指數跌至只有八十四分，首次喺兩岸四地之中敬陪末席。港人對生活及就業嘅信心只有「中性」，對經濟發展嘅信心更創下一年來最低，無論係物價、置業或股票投資均偏向悲觀，當中尤以置業「最悲」，信心指數只有大約五十四分咋。

係人都知，消費信心反映社會對未來經濟前景嘅判斷，消費者捨得使錢，呢個地方嘅經濟先至可以發展。香港素有「購物天堂」美譽，港人亦出名識得享受，家陣消費信心居然跌入谷底，即係對前景投下不信任一票。雖然負責調查嘅學者聲稱，從香港自身比較，消費者信心指數並無太大波動，只係其他三地成長較多，先至導致香港排名墊底喎。其實，呢啲只不過係自我安慰，港人對前景悲觀，消費信心唔跌至奇喇。

一葉落而知天下秋，港人對消費失去信心，正正係對社會前途、未來經濟失去信心嘅反映。梗係啦，家陣嘅香港百物騰貴，樓價租金高不可攀，政治爭拗無日無之，港人生不起、住不起、病不起、死不起，完全睇唔到前景，簡直係民不聊生，點敢消費吖。亂世來臨，前路茫茫，都係留啲錢傍身好過。

就以「最悲觀」嘅置業問題為例吖，港府係就係視為施政重中之重，仲好口響咁訂下未來十年建造四十七萬個住宅單位嘅目標添，可惜講就天下無敵，做就無能為力，拓土大計招招失靈，建屋目標只係畫餅充飢咋。仲有吖，醫療亂象層出不窮，食物安全警鐘長鳴，港鐵醜聞日日新鮮，甚至連幼稚園、小學都一位難求，政策推出一項跪低一項，所謂「穩中求變，適度有為」根本係笑話。施政癱瘓，社會空轉，時光蹉跎，港府無能成咁，以致經濟城市淪為政治城市，經濟民生冇人關心，未來點會有運行吖？

以前遍地黃金嘅香港，早就淪為明日黃花，怕且唔使幾耐，連「購物天堂」呢塊招牌都拆得咯。計太一叮話齋，政改爭議已成死結，佔領中環如箭在弦，廢柴政府仲話要迎難而上喎，有人信至奇吖，叮！