東網電視
更多新聞短片因為立法會財務委員會主席「星爺」吳亮星早前「強行」表決通過新界東北發展前期工程撥款申請，旋即成為眾矢之的。財委會尋日舉行特別會議，處理社民連議員「長毛」梁國雄對星爺提出嘅不信任動議，會議由副主席劉慧卿主持，合共有三十三名議員發言，建制同泛民多次就星爺主持會議手法隔空駁火。
工聯會王國興力撐星爺，形容對方係新議員，並按議事規則主持會議。但不消一會，議員陳家洛就發言糾正，話星爺早年曾擔任議員。議員郭家麒接力嘲諷星爺，以擔心星爺心臟同身體狀況為由，呼籲對方放棄主席職務。最終喺五十五人投票，三十二票反對、二十二票贊成，否決針對星爺嘅不信任動議。
不過，咪以為建制派勞師動眾硬撐星爺係心悅誠服，反而係另有盤算至啱，有人提醒留意曾一度叫星爺退位讓賢嘅新民黨葉劉淑儀發言，因為佢承認自己叫過卿姐做財委會主席，但同時強調唔會支持針對星爺嘅不信任動議，有人估計或者潛台詞，就係根本唔需要提出不信任動議，皆因星爺時間一到始終都係要走。
事實上，如果財委會唔再加開會議，星爺嘅財委會主席任期會喺本周六屆滿，換言之最多做多三日主席，因此建制派只係以時間換取空間，變相體面咁叮走星爺。星爺就透露，有議員擬發動簽名行動，要求將財委會關乎民生嘅議程項目調前，並將其他具爭議性項目調後，冀至少可審議並通過重建瑪麗醫院撥款，唔知政府準備點接招呢？
第一手消息請下載on.cc東網
