身兼全國政協委員的香港區聖公會大主教鄺保羅喺啱啱嘅周日崇拜佈道中，狂插有份七一上街遊行的人士只係「羊群心態」，「人叫口號佢哋又叫，但又唔知自己叫乜」、「唔知成日出咁多聲做乜？好似唔出聲就無機會，就會啞o架啦！」「仲有呀！有年輕人話今年唔出嚟行，出年就無o架啦！吓！咁我咪都要戴晒主教帽，同帶埋支杖去行？」「呢啲人心裏完全無平安，只收到一方面訊息，個腦筋完全唔識得去分析！」「耶穌喺彼拉多（判耶穌死刑的人）面前唔講嘢，好似一隻被宰殺嘅羔羊，默默無聲o架！有陣時，唔係一定要出聲嘅，無聲勝有聲！」

作為大主教，我唔知佢近期讀《毛語錄》多吖？定係無時間睇《聖經》？乜耶穌喺彼拉多面前無講番兩嘴「耶穌」？只是一隻沉默等宰嘅羔羊？鵪鶉似啲喎！好！等我查吓經至得！

鄺保羅政協委員宣道後，匿埋咗幾日唔見人，尋日，有件聖公會教省秘書長管浩鳴出來表示，以上鄺政協所講的，係佢「私人言論」，不代表教會立場；另外，佢講話以「風趣幽默」吸引群眾喎！吓！「私人言論」？一直係「神的代言人」，在教堂開壇說法，幾時會變成「個人意見節目」？若係私人嘅事，點解又會將錄音放喺教會內不斷重播？佢私人嘅事，點解佢自己龜縮暗角，唔蒲頭，要教區的「教省秘書長」代言？你好得閒咩？

鄺保羅的言論仲歧視和侮辱了「菲傭」添o架，唔該平機會正視好唔好？

至於講到鄺政協言詞好風趣幽默，哈哈！真係好鬼幽默啫！

紅星照亮下的香港特區，真係人才輩出，可惜車公一早講咗人鬼不分囉！我信車公多啲！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps