設計圖片及對白
世界盃賽事愈來愈緊湊，巴西喺尋日凌晨以一比七輸畀德國，無緣進入決賽，只可以爭奪季軍，令到好多球迷都好失望。立法會議員都唔例外，好似陳克勤、「長毛」梁國雄、胡志偉都係巴西隊粉絲，但佢哋見到巴西喺主場慘敗後，個個都垂頭喪氣，而建制派議員Ann蔣麗芸就巴西輸波借勢寸爆泛民主派。
克勤仔同胡志偉原本校定鬧鐘喺尋日凌晨起身睇波，但佢哋都唔知醒，喺接近下半場先起到身。不過，當佢哋喺電視見到巴西上半場輸成五球咁多，就即時嚇咗一跳，克勤仔決定繼續睇落去，而胡志偉就決定走去瞓覺。克勤仔話自從球星尼馬因傷退隊，巴西嘅整體士氣大不如前，加上上半場已經輸咁多，進一步打擊隊員意志。此外，巴西長期都係靠明星球員入波，隊員質素參差不齊，後防尤其遜色，話佢哋打得差都不為過。
倡為巴西輸波默哀
長毛話巴西排陣一開始就有問題，其他球員基本上都係為尼馬服務，依家尼馬一走，成隊波無咗個核心，所以尋日踢到潰不成軍。至於邊隊最有冠軍相，長毛就支持南美球隊，話覺得阿根廷最有勝算。
巴西搞到「七個一皮」，阿Ann尋日就喺社交網站以巴西輸波為題，寸爆泛民成日郁啲就要求引用《議事規則》或成立專責委員會徹查事件，咁依家巴西輸咗咁多球，泛民應該用《立法會（權力及特權）條例》成立專責委員會調查事件，或者要求立法會翻睇錄影帶，睇吓有冇人打假波喎。佢仲話，泛民議員試過提出要為南非前總統曼德拉逝世默哀，或者今次都為巴西輸波默哀啦！
第一手消息請下載on.cc東網
