中小幼教一條龍 最怕官僚一條蟲
政府正研究中小幼一條龍嘅可行性，一拖再拖仍冇下文嘅十五年免費教育，終於見到少少眉目嘞。問題係有關政策涉及不同利益團體，說易行難，可唔可以落實，市民拭目以待。
教育局局長吳克儉日前放口風，話正探討將幼稚園搬入資助中小學校舍營運，形成「彈性一條龍」，將學生人數「拉上補下」，減低教育界嘅震盪。佢形容呢招係「天馬行空」，但似乎係為十五年免費教育鋪路。
好多地方已經實施十五年免費教育，但本港只得十二年，包括中學同小學，獨缺幼稚園，包啲唔包啲，好似本港單車徑咁，變咗斷橛禾蟲。原因好簡單，一方面，大批雙非學童湧港搶學位，造成中學、小學及幼稚園適齡學童人口大幅波動，另一方面，位處非政府物業嘅幼稚園因為租金飆升，生存空間愈來愈窄，阻礙咗十五年免費教育嘅推行。從理論上講，解決咗校舍問題，十五年免費教育亦都可以水到渠成。
近年由於出生率持續偏低，整體學額需求不斷下降，殺校同縮班成為大趨勢，搞到好多學校要各出奇謀擴大生源，希望避過落車危機。如果呢啲學校可以同幼稚園分享校舍，物盡其用，各得其所，完全可以達到雙贏局面，不失為一條好橋。
怕就怕，弱勢政府有心無力，落實無期，最終好橋又變成爛橋。呢嗱，對於教育局中小幼一條龍嘅建議，幼稚園業界就普遍認同，話如果中小學可以騰出空間，長遠可以將原來屬於私營嘅幼稚園教育納入資助軌道。不過咁，資助中學同小學就有唔同睇法，有人質疑建議脫離現實，因為升小學人數未來會持續增長，到時將面臨加班、加派同回復大班嘅問題；亦有人批評當局欠缺周詳規劃，擔心教育局「醫到頭就輪到腳痛」。
話時話，業界嘅擔心絕對唔係杞人憂天。回歸以來，本港教育政策朝令夕改，教育官僚經常頭腦發熱，拍拍後尾枕就推出各種措施，令學校、家長同學生無所適從。母語教學係咁，語言微調又係咁，總之五時花六時變，搞到教育水準每況愈下。加上家陣香港高度政治化，弱勢政府動輒得咎，政策出台已經舉步維艱，推行更加阻力重重，隨時可能會跪低。
所以話啫，中小幼教一條龍，最怕官僚一條蟲。咪話太一叮唔提醒吳局長，既然十五年免費教育係重中之重，唔該閣下講到做到，如果仲係得個大隻講，到頭來分分鐘衰多瓣，咁就真係唔得掂o架喇，叮！
