政壇： 亂噏反佔中周融倒米
俗語有云亂噏當秘笈，但亂噏就絕對會有副作用。號召反「佔領中環」行動嘅「幫港出聲」發起人周融，尋日出席個活動時提到自己有幾擔憂佔中發生，一時話驚香港「焗爆煲」，一時又講六七暴動時，好彩有英軍介入，否則香港警察一定頂唔住；連比喻揀特首候選人，佢都要拋個女仔揀老公嘅不倫不類例子，話個女仔可以唔嫁喎。做咗傳媒人咁耐，周融好應該知道港人最忌諱普選冇得揀同中央介入香港事務，咁樣亂噏，唔係倒米係乜嘢呢？
設計圖片及對白
民建聯南區支部尋日喺華貴邨舉行政改座談會，邀請咗基本法委員會副主任梁愛詩同周融等人出席，詩姐嗰部分係閉門會議。至於周融就質疑真普聯等泛民主派提出一定要公民提名嘅方案，又將二十幾名泛民議員綑埋一齊，其實係玩緊啤牌「廿一點」，想將香港「焗爆煲」，走向佔中，因此港人唯一自保方法就係要和平同理性咁爭取普選。
讚英軍鎮壓六七暴動
與會有一位讀緊大學二年級嘅同學話佔中宣傳會和平進行喎，周融即時反駁話，欣賞佢有赤子之心，但做人唔可以咁天真，因為世上好多嘢都係控制唔到。佢又憶述番一九六七年仲任職記者嘅時候，話如果出現混亂，啲人又癲起上嚟嘅話，政府根本就管唔到咁多，假設有人參與佔中，大批警力去晒中環，咁如果旺角同佐敦發生搶劫案呢，咁就大件事喇。所以六七年好彩有英軍鎮壓，否則只靠香港警察一定頂唔住。
之後，又有一名女同學問，如果屆時只有三名特首候選人，市民又唔想揀又點算呢？周融就話，如果同一個女仔講，話有林峯、黎明等畀你揀，梗係正啦，不過如果覺得三個都唔好，咁咪唔好揀囉，女仔都可以唔嫁啫。
