政壇：搞搞政：政黨年宵檔 無創意鬥hea
維園年宵開鑼，各大政黨每年都按傳統租番個檔口賣嘢籌款兼宣傳，不過，今年政黨攤檔似乎鬥「hea」咁，民主黨（白鴿黨）一味賣廁紙，支聯會整啲USB記憶體嚟賣，新民黨就趁住馬年到賣馬公仔，即使係向來創意無限嘅人民力量（人力）都只係翻炒「回水」議題設計咗款風車，行年宵嘅市民會幫襯邊檔？睇嚟人力喺芸芸hea檔中算交到貨！
陳偉業揸住風車，寓意要政府回水。（設計圖片）
有「乳鴿」將曾經紅極一時嘅「路福西」狼公仔等印上廁紙，喺白鴿檔中售賣，仲聲稱立法會議員王國興早前收集返嚟嘅公廁廁紙更潔白、更順滑。不過，佢哋嘅一套兩卷廁紙賣成三十八元，即使買四卷有特價亦偏貴，但該黨今年檔租要成五萬四千元，最少要賣逾三千卷先至維到皮，仲未計燈油火蠟等成本，年宵想封蝕本門都唔易。
至於人力就整咗個「回水一萬元」風車，其實只係二次創作咗張假金牛扮一萬元，摺起當風車送畀支持者。不過，過年要講意頭，風車又係假金牛，算係有啲心思。
