政壇：2000小畫家見證晶晶加冕
聯合國兒童基金會尋日在維園舉行小畫家大夢想繪畫比賽，霍家新抱郭晶晶喺二千多名小畫家見證下，獲委任為聯合國兒童基金香港委員會大使，成為該會創會以來首位奧運金牌得主大使。初為人母嘅晶晶話好榮幸獲委任，經歷過懷孕生仔後，佢更加關注兒童各方面嘅需要，特別覺得中國貧困地區兒童及兩地母嬰健康工作好有意義，希望天下間所有寶寶都零受苦。
郭晶晶（右二）與陳晴（左）係相識多年嘅好友，彼此會分享湊B心得。
委員會主席陳晴（Judy）致辭時呼籲善長仁翁慷慨解囊，幫助內地有需要嘅小童。Judy同晶晶相識多年，分屬好友，亦有同晶晶分享吓自己嘅湊B心得，晶晶都話自己懷孕初期，多得Judy分享經驗，因而令佢佗B佗得輕鬆啲喎。晶晶又透露，囝囝仲有幾日就五個月大：「佢每日都不一樣，可轉身及坐一會兒，好驚喜。」至於啟剛有冇幫手湊B，晶晶就話啟剛工作忙，但下班後一定會抱抱囝囝嘅。
農曆新年將至，問到會否教定囝囝做恭喜手勢去逗利是？晶晶笑言：「有教動作，但未學識，教他做動作時好好玩。」佢又話，因為囝囝太細，加上老家太寒冷，所以不會回老家喇。
