Fundman睇市：中行強勢可持續

港股反撲乏力，多少同滬港通未有進一步消息有關，趕唔趕得切十月開通，本地賓架話仲係五五波，不過尋日個市傳中證監口頭確認，可以趕得切十月廿七日通車，真定假都好，中資券商股炒定先，中州證券（01375）急升21.7%，中國富強金融（00290）升14.3%，第一上海（00227）及耀才（01428）升2.5%，信達國際（00111）升2.4%，至於海通證券（06837）則升1.6%。

後市預測偏審慎

四中全會下周一召開，里昂報告話以往紀錄，會議前兩星期，股市平均升3.2%，會議後一個月都仲有3.4%升幅，不過基於正值中國經濟調整，增長放緩，對後市睇法亦都比較審慎，較睇好的股份包括中國海外（00688）、潤電（00836）及長城汽車（02333）。

投得港鐵（00066）大圍站項目的新世界（00017），尋日升2.9%，收報9.53元，高盛報告話供股後相對低的負債比率，有助新世界更積極補充土儲，估計今次大圍項目總發展成本134億，落成後每呎賣萬三蚊，計及與港鐵分成後，估計有80億元稅前利潤，不過一七年前會因為資本開支增加，每股盈利少2%，高盛畀中性評級，目標價9.75元，比先前調高一毫子。

高息資產受追捧

近排大市缺乏消息，人人都只睇實滬港通，除此之外，最搶眼要數內銀股開始在離岸市場發行優先股，已經獲中證監祝福的中行（03988）以及農行（01288），前者打頭陣，尋日宣布發行65億美元的優先股，以補充資本。

尋日指引定價息率介乎6.875至7厘，比早兩個月市傳的7.5厘低，不過眼見美國債息級級落，環球資金四圍搵高息投資，但凡有yield的都好似螞蟻螻蜜糖咁款，傍晚截飛後聽返嚟，認購額230億美元，超額3.53倍，以6.75厘定價。

到底買優先股好啲定係買股票好啲？對於追逐定息回報者，好似保險公司來說，在現時主權債息處於罕見歷史低位的情況下，中行優先股的吸引力當然大。不過對普羅股民來說，就算畀到私人銀行入場費，又唔怕中行一級資本比率觸及5.125%被迫換股（當然可能性是極低），但如果純為追股息，倒不如諗番佢嘅正股。

過去三年，中行每股派息0.155元、0.175元及0.196元人民幣，計落現價3.53港元，往績股息率都貼近7厘，儘管預計未來幾年股息升幅將會放緩，不過依家個市實在無乜嘢好揀，超低息期極可能捱得比預期耐，除中行外，將會陸續發優先股的三大行，中短期內斷估都會受惠於消息，相對比較強勢。