政府近年都賣咗唔少地皮，呢批地皮陸續獲批建築圖則。劉Sir睇見屋宇署最新資料，八月份共批23份圖則，唔少係政府主動賣出嘅地皮。以首度批出建築圖則嘅項目做統計，發展樓面共逾166萬方呎，包括有會德豐地產投到嘅何文田常富街住宅地皮，准建6幢中低密度分層住宅，至於香港興業（00480）嘅屯門湖安街亦批建最新圖則。

會德豐地產的何文田常富街住宅項目獲批建築圖則，將發展6幢16層高住宅物業。 (資料圖片)

八月份獲批建築圖則的部分項目

屋宇署資料顯示，八月份該署批出23份建築圖則，其中9項係住宅及商住發展，劉Sir發現呢啲項目都似曾相識，原來唔少係最近政府主動批出嘅地皮，好似上述會德豐地產喺舊年用咗超過38億元投返嚟嘅常富街項目，項目獲准興建6幢16層高分層住宅，另設1層平台及2層地庫，總樓面約38.8萬方呎。

屯門都有兩幅政府地獲批則，好似香港興業舊年中標嘅屯門湖安街與湖康街交界地皮，准作1幢24層高商住發展，住宅及商業樓面大約10.5萬及約2.8萬方呎；至於堡獅龍羅氏家族投得嘅同區虎地52區低密度發展就比較特別，會提供1座2層高洋房，同埋8幢只有2層高嘅分層住宅。

首八月落成量飆4.8倍

唔單止住宅，亦有政府批售嘅商業地皮順利過關，如太古地產（01972）舊年年底投得嘅九龍灣宏照道與臨利街交界商業地，就准建1幢25層高商廈，總樓面約莫55.5萬方呎。

屋宇署亦同時公布私人住宅落成同動工量最新數字，其中落成量截至八月累錄9,657伙，唔單止比舊年同期多出超過4.8倍，仲創咗近九年以來同期新高。不過動工進度就較失色，頭八個月動工單位共約4,104伙，按年減少大約44.4%。

補價金額增 七季最多

而地政總署噚日公布最新補地價數字，其中第三季補地價金額約47.23億元，比起第二季增加約莫92.1%，係近七個季度最多，其中最大宗個案係港鐵（00066）將軍澳日出康城四期，補價金額約27.1億元。

期間有3幢觀塘工廈成功活化，包括偉業街135號、鴻圖道25號以及巧明街71號，同時簽立特別豁免書，作為寫字樓及商店等用途。