前晚聯儲局議息，主席耶倫會後講話，用字比市場預期更具鴿味，保留了將維持低利率一段時間，以及勞動力資源嚴重使用不足的字眼，美債息先挫後揚，主要是聯儲成員對中期利率預期向上的細節曝光，十年美債息掉頭收2.6厘，升0.01厘。前晚美股三大指數回升，港股走勢弱到離譜，恒指收市跌207點，報24,168點。

內地股市散戶佔比高，選股偏好與機構投資者為主的港股有異。（資料圖片）

太陽日誌

上海股市歷史市盈率

唔經唔覺，九月去到依家，港股得三日升市，增長股唔掂，就連叻過一陣的電訊股、三桶油都有轉勢迹象，尋日比較搶眼嘅，就只得連日遭到基金摧殘的濠賭股，金沙（01928）升1.4%，銀娛（00027）升1.1%，連同新地（00016），50隻藍籌得3隻唔使跌，反映整體大市拋售壓力都幾全面。

中國電子（00085）以每股1.63元批3.38億股，佔擴大後股本16.67%，集資淨額5.35億元，資金無特別指定用途，尋日曾炒上2.26元，比批股價高三成八，收市升幅收窄至4.6%，報2.01元。睇中期業績，呢間從事集成電路設計開發及提供解決方案的紅籌企業，無突出之處，賺1.1億元，升4.9%，睇嚟今次批股又係私人派對果類，自己圍內玩晒。

外資行磨拳擦掌

包括筆者在內，相信唔少看官都等緊滬港通開車，睇吓阿爺點樣可以好好睇睇做場好戲。不過見唔少媒體對內地股民所作調查顯示，投資者對買港股的興趣，唔似我們想像般大。事實從發出QDII的配額中，已使用的大約僅佔三分之一，可見滬港通會否吸引更多北水南流香港魚缸搵食，值得懷疑。

反而見近期密鑼緊鼓為滬港通生意做準備的外資行，個個都傾向睇好南水北調可能帶來的機會。唔少陰謀論亦認為，這才是滬港通的核心，一來為停泊了近9,000億人仔游資的人民幣離岸中心香港，製造更多實質人民幣需求，並藉此逐步推行資本帳開放，一石二鳥的部署，也同時可以為A股吸引更多外資，確立中國股市在環球市場的地位，往後好處唔使畫公仔畫出腸，可以預期如果滬港通成功，MSCI好難再搵藉口繼續將A股摒除於環球基金經理的benchmark之外。

投資者各取所需

自滬港通消息曝光以來，對兩市影響的分析，很多論點不容否定，可以肯定，AH差價會因此逐漸收窄，一些未有於A股上市的公司，如騰訊（00700）、中移（00941）、聯想（00992）等，及內地投資者較難接觸、海外收入主導的企業如和黃（00013），都會較受內地投資者歡迎。反之內地股市的機構投資者與散戶比例呈二對八，與香港剛剛相反，形成一些選股偏好差異。以內銀及內險等重磅股為例，A股每每較H股有折讓，預期會是北上投資者優先考慮的對象。

二○○○年以來，上海股市的市盈率由高峰跌近八成，上證50指數成分股更跌了八成九，A股的PE大貶值，完全抵銷了上市公司的盈利增長。未來透過滬港通引入內地股市缺乏的價值型機構投資者，係咪能夠解決A股估值低落的局面，筆者認為才是這個巨大實驗，長遠最值得關注的重點。