車位價格愈升愈有，發展商亦唔執輸醞釀新一輪車位拆售潮。消息透露，新地（00016）等一直保留收租嘅西區寶翠園約400個車位，最快今個月啟動拆售攻勢，市場估計平均每個售價高達300萬元或以上，市值高逾12億元，勢成近年涉資最多嘅單一屋苑拆售車位行動。另同系多個樓盤入伙亦將陸續推售車位，令集團短期發售車位數量有機會多逾千個。

寶翠園車位一向供不應求，二手租售價屢創新高。(資料圖片)

新地旗下部署推售車位屋苑

眾所周知，寶翠園車位一向租售有價，近年更屢錄破頂價租售成交，原因係成個屋苑夾埋只有約500個車位，發展商早年只係有限度拆售咗約80個，其餘一直保留收租。

參考二手 價或新高

喺供不應求情況下，寶翠園最貴二手車位成交價已升到去330萬元，月租更曾錄最高約8,000元紀錄，租值足夠喺新界租個上車單位嚟住。

劉Sir收到風，發展商最近已通知咗屋苑業主有關稍後拆售車位嘅意向，但係具體售價同銷售詳情仲未公布。據可靠消息話，發展商唔會一次過全數盡推所有車位發售，首批只會先推部分試下水溫，售價一定會以屋苑二手車位成交價做參考。

睇番登記資料，屋苑今年曾有二手車位以330萬元易手，創屋苑新高，唔排除部分位置較佳嘅一手車位，售價有機會再創屋苑新高。

因應寶翠園本身屋苑業主對車位需求龐大，首階段拆售只會率先賣畀業主。代理估計，呢次寶翠園拆售車位嘅反應會幾理想，淨係班一手車位租客都應該會搶住入市認購，以免日後要向二手業主承租車位「捱貴租」。

據聞，依家屋苑一手車位月租只係大約4,000元，但閒閒哋等一年半載都未必輪到車位，造就二手車位租金係咁升。

新盤入伙帶旺車位

除咗寶翠園，新地多個入伙新盤開始或部署緊推售車位，其中元朗爾巒近排逐步開始發售車位，最高成交價110萬元，創元朗區歷來新高；同系將軍澳天晉早前亦推售新一批車位，最高成交價198萬元，再創區內新高；旗下天晉II及屯門瓏門II等陸續入伙，料亦將會加入推售車位行列。