聯儲局議息聲明沒驚喜，繼續話低息環境會維持一段時間，但聯儲委員調高明年美息預測的中位數，消息對美股影響唔大，隔晚三大指數微升收場。反而港股弱勢未見改善，前日人行向內銀提供流動性的刺激短暫，昨大市跌207點，報24,168點，主板成交701億元。

恒指期指走勢

即月期指除卻開市一刻試過抽升見24,338點，其後在現貨開市後，大部分時間在24,200點樓下運行，即市低位24,072點，午後好友反撲的意欲唔強，日市收24,153點，成交5.6萬張。

十個交易日跌足九日，昨日市況比筆者預期更弱，得三隻藍籌有升幅，博指數重返50日線追買好倉的計劃根本無執行機會。值得留意，八月初以來，金管局再無入市干預，而近幾日見港匯開始偏離7.75的強方兌換保證界線，反映湧入熱錢較之前有減少迹象。

儘管港股開始進入超賣區，但催化大市反彈的因素仲未出現，單睇人行提供常設借貸便利（SLF）僅令港股反彈一日，短期阿爺出手機會大減，一直等買的筆者，先機已失唔打算反手，暫時惟有再等機會。