港股前日升定先，尋日又再玩反高潮，恒指收場唔見兩舊，但二、三線股一於照炒可也。尋日主板首廿大升幅榜股份，升幅介乎一至三成，大部分都係二、三線股。暴炒妹在六月推介過的堡獅龍（00592），呆咗兩、三個月，終於藉業績消息勝預期破頂，都算守得雲開。此外，尋日見到有資金流入光伏股，其中保利協鑫（03800）個勢最靚，可以搭轉順風車！

撇除歐美針對中國光伏業的制裁行動，展望下半年全球光伏市場持續改善，光伏產品價格趨穩，光伏板塊氣氛亦有望持續回暖。德銀最近亦發出報告，指近半個月內地光伏產品需求回升，模塊價格、使用率亦在上升，相信未來數月供應或現短缺。

早前國家能源局發布發展分布式太陽能發電政策，國策支持將為光伏股提供最大後盾，下半年板塊表現有望跑贏大市。選股當從強勢股入手，保利協鑫屬首選，上周股價見高位3.08元後現調整，尋日反彈並成功站穩3元樓上收市，一旦突破今年三月高位3.18元，有機會踩油開轉快車，博佢上試3.3至3.5元區域。