聯儲局議息聲明未有刪去「維持低息期一段長時間」的字眼，加息威脅暫除下，刺激隔晚美股做好，道指收市升24點，惟港股經過日前反彈後，昨日反而在內銀股及石油類股份拖累下，再次掉頭下挫，恒指收市跌207點，差不多將日前的升幅全部回吐，收報24,168點，全日主板成交701億元，國企指數則跌93點，以10,799點收市。

墨龍作為內地三大油企少數合資格油套管供應商，實力毋庸置疑。(資料圖片)

央行向五大行提供5,000億人民幣SLF，消息刺激內銀股前日顯著反彈，惟昨日升勢無以為繼，建行（00939）回落1.3%，工行（01398）及中行（03988）跌不足1%。由於市場估計央行實施SLF後，短期減息及全面降準的機會大減，因此內銀股難以進一步向上。

醫藥股候低吸納

恒指已連續出現九支陰燭，大市短期缺乏上升誘引，而且牛證收回區唔少喺24,000點附近水平，睇嚟淡友殺到現水平，無理由唔隊穿埋24,000點，所以不妨靜觀其變，唔使急於撈底住。

醫藥板塊近日明顯有資金流入，表現跑贏大市，昨日中國中藥（00570）、綠葉製藥（02186）及金天醫藥（02211）均創五十二周新高。事實上，醫藥股已經升咗好一段日子，短期升勢放緩亦無可避免，如果一直都無參與過，不妨等調整吓至再買。

大市偏軟下，資金持續流入炒作細價股，睇尋日升幅榜，唔少都屬於傳統「莊家股」，自認身手敏捷者先至好玩。由於市場缺乏炒作新概念，而「滬港通」即將開通，AH差價股不時成為市場炒作對象，山東墨龍（00568）昨日再獲追捧，股價創5.45元新高，最後以5.44元收市，逆市升10.56%。

山東墨龍主要從事石油機械、加工業務，以油管、套管、石油專用無縫管等產品為主。集團是內地三大油企的少數合資格油套管供應商，實力毋庸置疑，惟公司截至六月底止中期業績，純利按年下跌79.7%，至924萬元人民幣，表現一般。近日股價炒上，純粹因為AH股差價因素

以四月低位1.85元計，墨龍累積升幅近兩倍，已脫離基本因素，故現水平追入風險頗高，所以即使股價破位而上，亦不建議投資者現水平再追入，持貨者亦不妨考慮趁高沽貨獲利。