Fundman睇市：內地股市 等運到

自○七年十月滬綜指見過6,124點之後，這全球第二大經濟體股市，簡單嚟講係無段好睇，今年更加衰到無朋友，年初至今滬綜指五度下試二千點關口，包括尋日低見1,996點，雖然收市報2,005點，跌21點，但睇番今年觸及2,000點後的反彈一次弱過一次，2,000點似豆腐底多啲。

滬綜指1,011隻股份中，尋日做個籠統計算，篤機睇滬綜指股份綜合市盈率為9.7倍，唔使講都知係歷史新低，不過低過9.7倍PE嘅股票居然只得96隻，佔一成都唔夠，意味少部分巨型上市公司，貢獻了指數權重大部分盈利。合理的推測，其他九成股份未必像市場想像般便宜。

基金經理冇胃口

事實上，全球最賺錢幾間銀行，都屬於阿爺轄下的國有銀行，同時在A與H股市場上市，在香港魚缸上的，五、六倍市盈率一樣無法引起芬佬胃口，說明當基金經理齊齊唔信盤數係真嘅時候，市盈率已失去作為比較股份估值高低的意義，內銀股係咁，A股亦然。

到底A股及中資股的信心催化劑幾時至出現？史提芬認為要睇阿爺容忍度可以去到幾盡。國家主席習近平話要容忍較慢的經濟增長，克強經濟學提出放棄粗放型經濟，要重質不重量，假如真係堅持唔行四萬億基建舊路，兼唔肯放水，可以想像個市要衰幾耐有幾耐。

樓市銷情續惡化

話雖如此，但筆者未完全死心，事關見周末國統局公布四月全國70大城市新盤銷售價格，得44個按年仲有得升，比三月的56個少12個。鑑於早前「五一」黃金周新盤銷售災情嚴重，五月數字九成九會繼續惡化。

似乎中南海都聞到樓市燶味愈來愈濃，在上星期央行會議上，指示15間商業銀行要保障首套房貸，但實情係內房在消息後一彈又散過，一來今次純粹出口術，並非強制性救市政策，而且客觀環境上，阿里巴巴餘額寶過去一年搞到內地銀行頭都痕晒，最近有銀行出到5.5厘的理財產品留客，最好佢哋真係有咁筍嘅貨幣基金可以搵到如此高回報，非為留客而「硬食」畀高息，否則銀行息差內傷之餘，更加唔會有興趣用5.5至6.5厘（幾乎是資金成本價）借錢畀買樓的業主。

中央話頭號敵人是環境污染，但筆者認為真正挑戰仲係愈調愈升的樓價。一四年第一季，內地樓市好可能出現一個三至四年周期的高峰。未來內地樓市愈差，意味距離開水喉的日子會愈近，不過準買家見債台高築的發展商，待售單位一大堆，最終只有劈價促銷一途，等跌先買心態一旦形成，要托市也殊非容易。到底今次中央點拿捏，大家等睇好戲。

查實近月內地地方政府各自微調樓市調控措施，但收效唔明顯，外資行估第一季GDP偏離7.5%目標唔遠，政府有條件等埋第二季經濟數據先決定點做。股市往往比經濟走得更前，碰正今年六月又係世界盃傳統股市淡季，屆時港股可能更加靜局，押注政策市拐點，睇嚟較大機會在世盃吹雞散場前後兩星期內。