面對內部經濟增長持續放緩，外部中越局勢緊張，祖國內憂外患有待解決。A股滬綜指兩千點危危乎，港股雖然只微跌收市，但大市成交僅471億元，可見連大戶都少做少錯，散戶宜減少短炒，多着眼中長線布局。

華潤燃氣股價早前受系內問題拖累，故估值相比其他燃氣股吸引。（資料圖片）

近日有兩位做生意的內地朋友來港一聚，其中一位做電貿行業的友人話，今年生意比去年差，還預計未來會一年差過一年，皆因競爭日趨激烈，而線上客戶的消費習慣日趨成熟，市場開始歸邊發展。諗起阿里赴美上市叫價甚高，網股估值不斷向上，相信板塊估值的階段性頂峰亦會隨之來臨，故維持建議相關股份逢高減持套現。

內房股短線續看淡

另一位來自溫州的友人就話，依家想知行家狀況如何，問佢手頭有幾多樓便可知一二，皆因溫州樓價已較高峰跌五成，依家仲跌緊。若然答冇樓在手，應該好穩陣；好多樓在手，就可能好唔掂，事關依家生意難撈，當地人炒樓多數十個煲五個蓋博到盡，依家每月按揭供款吃力，想沽貨套現又沽唔出，搞唔點就被迫斷供，故當地部分銀行的物業按揭貸款壞帳亦正在上升云云。

聽完當地人說法，再回想最近投行係咁唱淡內房，人行又開腔談內銀樓按，顯見內房形勢轉差真係冇花假，加埋六月又係「水荒」季節，短線內房板塊都係行人止步。

燃氣股尋日逆市做好，中國燃氣（00384）升5%、華潤燃氣（01193）升3%、新奧能源（02688）升3%、北控（00392）升2%元。俄羅斯領導人普京本周訪華，市場憧憬雙方將就中俄天然氣管道談判達成協議，合理價格氣源供應增加，配合內地用氣需求持續增長，下游燃氣供應商的毛利前景展望能見度大大提高。

環顧一眾燃氣股，中國燃氣及新奧都是基金首選，但現時估值之高，亦係板塊之中數一數二，建議候回吐再考慮。北控除燃氣業務外，亦兼營水務等業務，屬穩健之選，但股價升勢亦較溫和。至於華潤燃氣，母公司前高層涉貪事件尚在發酵，其估值亦受壓力，但相信長遠業務不會受今次人事變動影響，站在中長線角度，潤燃現時的估值較值博，向上兩個阻力位分別在26元及28元，250日線支持在22元。