前周歐洲央行行長德拉吉的言論算係近日亮點，至少六月五日歐洲央行議息前，歐元都係偏淡。美國商品期貨交易委員會公布的芝加哥外匯期貨，截至上周二嘅歐元由淨持倉變成淨沽空，反映市場繼續信德拉吉。

歐元兌美元走勢

除日本外，美國、歐洲同中國三大經濟體喺第一季度增長都比市場預期為弱，其中歐洲只得0.2%增長，明顯只靠德國單天保至尊，其餘法國同意大利都令人憂慮，下月歐洲央行議息，好大機會減息，投資者對歐元態度開始轉變。

今個星期歐元區就公布一系列製造業同服務業PMI數據，如果數據無大幅改善，只會令市場對減息的預期升溫，歐元如有機會抽番上少少，可以考慮沽，阻力係1.3760至1.3780，止蝕放1.3840，目標就睇上星期低位1.3640。

今年年初以來，買股票的回報竟然不及國債，而美債息亦跌穿2.5厘，都令今年睇美國債息抽上的一眾專家大跌眼鏡，可能觸發佢哋平倉，進一步推低美債息，另一方面亦可能反映緊市場對經濟前景的睇法有少少改變，雖然聯儲局退市步伐持續，不過如果美國經濟復甦預期較慢，可能反映美國加息時間表進一步推遲。

今個星期聯儲局將公開最新議息紀錄，主席耶倫周三晚會發表講話，另外亦有多名聯儲局官員包括費希爾、普洛瑟、杜德利等先後發言，市場會進一步搵線索嚟印證呢個睇法。