處於歷史高位的美股，有點歲晚收爐味道，道指失守16,000點關。始終本周多項影響聯儲局退市決策的經濟數據出籠，華爾街投資者傾向保守，是可以預期。巧合地，海嘯後折騰多年，恒指幾經辛苦才收復的24,000點心理關口同樣「坐唔暖」，港股第二日向下，尋日再跌181點，報23,728點，成交不跌反升去到679億。不過市有市跌，整體市場氣氛卻唔差，上升股份674隻，比下跌股份665隻為多。觀乎41隻股份升幅達雙位數字，升幅超過兩成的亦有10隻，三四線有禾雀亂飛的味道。

太陽日誌2013/12/5

綜合大行預測北控水務業績（港元）

昨提過幾隻乳業被基金掟咗幾日，成交縮晒，個樣似抖完氣，話口未完，藉國際全脂奶粉價橫行近兩個月後再度抽升，乳業股鑊氣番晒嚟，輝山（06863）升1.3%，現牧（01117）升1.4%，潛艇原生態牧業（01431）升2%，合生元（01112）升2.8%，雅士利（01230）升4.4%，始終對比純粹炒一兩日，無故仔跟尾的三四線，國策炒始終較正路。

業務呈良性循環

近一年大市其實好兩極化，有國策扶持、增長故事配合嘅板塊，大部分估值都係高處未算高，好似乳業、互聯網、環保及再生能源等。另一類基金一直提唔起大興趣，但考慮到估值低殘，故偶有突擊，好似資源、水泥、電力設備、航運類。近期筆者介紹過嘅中信泰富（00267）及中國建材（03323）都屬於後者，未必啱全攻型股民嘴型。

今年最遺憾係錯過北控水務（00371）及光大國際（00257）兩隻倍升股，兩隻共通點係食正內地環保概念，專攻污水處理，且估值從來唔平，公司手上項目吸引，又不愁大孖沙自動獻金。好似北水，九、十月份分別向馬來西亞政府基金及北控集團旗下北控環境建設批股，收購返來的新項目貢獻又支持增長，將估值再推高形成良性循環，情況有點像幾年前的中國燃氣（00384）。

國務院推《城鎮排水與污水處理條例》，規定縣級以上政府要把城鎮排水與污水處理納入社會發展規劃，鼓勵採取特許經營或者政府購買服務形式的污水處理項目，為專攻污水處理的公司，提供更多合約機會。大行估北水明年盈利14.5億，升35%，一四年PE24.7倍，估值唔平，但未至於好離譜，預期未來幾年在市場滲透率擴大下，管理燃氣同污水處理的公司，可毫不費力保持理想增長，有調整低買機會固然要把握，就算無，投資者亦宜把一部分注碼投入，免得錯過行業漫長的擴張期。

收市後熔盛重工（01101）發盈警，預告全年業績將會見紅，以上半年收入大跌71%，由舊年的54.6億元（人民幣．下同）跌到落去15.8億元，業績盈轉虧蝕2.9億元，斷估都無人會預佢下半年可以翻身。熔盛十一月股價由0.9港元炒上1.22港元，到底投機者對醜股的決心會有幾大，今日係一大考驗。