政府「辣招」令工廈交投減少，但成交總值就不跌反升。有代理計過，今年頭十一個月，工廈全幢買賣只有16幢，比起舊年全年少兩幢。不過，成交金額就去到53億元，比起舊年全年多出約7億元。其中以鄧成波（波叔）出貨最多，今年已連環賣走5幢工廈。不過，今年甲級商廈買賣價同租金都睇跌，好似上季中環甲級商廈呎租120元都冇。

今年較矚目的工廈全幢買賣概況

近年工廈全幢成交走勢

劉Sir睇番中原地產同市場資訊，今年頭十一個月，全幢工廈買賣暫只有16幢成交，同舊全年約18幢相比，暫時少兩幢；而期內成交金額反而有約53億元，比舊年全年約46億元，暫時多約7億元，增幅逾15%。

基金9.8億 觀塘入貨

今年嗰16幢工廈成交，其中有5幢由波叔沽出，單喺出招前佢就先後賣出觀塘長輝工業大廈，同埋葵涌成功中心，共套現逾16億元，兩幢帳面賺近10億元，成為今年工廈嘅「大贏家」。

近幾年無入市工廈嘅基金，今年都出手。根據韋堅信測量師行資料顯示，觀塘建大工業大廈，今年四月以約9.8億元賣咗，呎價約4,900元。此外，土地及公司註冊處資料顯示，買家公司董事包括黃景威，該公司註冊地址與鵬里資產管理相同。

商廈做價看跌半成

相比之下，今年寫字樓無運行。先睇萊坊份報告，第三季中環甲級寫字樓平均呎租僅約119元，按季跌1.3%，較去年同期升0.3%；而全個亞太區計，由於印尼雅加達上季呎租達約41元，按季彈升28%，所以整區該類物業按季租金指數升0.5%。

另外，高力國際亞洲研究及諮詢行政董事盧永輝補充，寫字樓買賣價去到年底應該要「見紅」，睇跌5%。唯獨工廈租金料有兩個巴仙嘅增長。