魚缸Blogger：金界盈利前景可觀

尋日賭股未有獨領風騷，但金界控股（03918）又再破頂，即市一度升至7.86元的一年新高，埋單仍升8.7%，收報7.68元，收喺保力加通道頂部7.48元樓上，14日RSI未算超買，憧憬公司在俄羅斯同越南分到餅仔，下站先睇8.4元。

金界喺柬埔寨經營酒店同娛樂城，擁有賭場獨家經營權至二○三五年，除現有NagaWorld外，Naga2料於後年竣工。睇番成績表，公司今年首三季收入增長14%至2.16億美元，電子博彩機及大廳賭桌業務量分別增長15%及16%，而貴賓廳泥碼則增加13%，期內到訪柬埔寨嘅旅客多咗接近兩成，當然多得內地旅客唔少。

再講吓賣點，金界業務具壟斷性，公司無因為咁偷懶，九月斥不少於3.5億美元在俄羅斯濱海邊疆區發展一個酒店同賭場娛樂城，另佢亦有意進軍具潛力的越南賭業，盈利能力同前景均可觀。