美國民主共和黨爭最終導致政府部門半癱瘓，不過市場似乎預咗花槍唔耍得幾耐。摩通話，一九七六年至今，美國政府已經拉閘十七次之多，拉閘平均歷時七日，期間標普五百指數平均跌0.8%，但重開之後一至三個月，美股卻係升多跌少。事實過去兩日，由其他金融市場反應可見，環球股債市反應平靜，除剛剛公布失業率差過預期，兼落實推消費稅的日本股市插水之外，亞洲股市大都炒番轉頭。

太陽日誌

綜合大行預測華創業績（港元）

港股雖然升，但卻由最多升279點，最後縮到升得124點，收22,984點，低過開市價22,997點，陰燭收市。國企指數更係肉酸到極，由最多升124點到埋單升得17點，收報10,333點，連續十日陰燭（也是十四日內第十三支陰燭）。雖然話國企股成交比九月初計少一截，但日日開得高收day low，顯見排隊減磅嘅大孖沙，遠比等買貨的多，並非好兆頭，似乎對於A股假後復市，都唔可以抱太大期望。

昨日長和孖寶夠晒搶眼，長實（00001）及和黃（00013）分別升3.8%及3.2%，收122.6元及95.95元，兩隻股票貢獻恒指47點之多，電能（00006）計劃分拆港燈上市之外，輪到傳屈臣氏分拆上市，有分析員計數，認為估值高達2,500億至3,000億元，是系內最巨型一個項目，一旦成功分拆，估計集資額介乎620至780億元，比一一年去新加坡上市的和記港口集資額多四至七成，可以令和黃負債比率一下子降至20至25%。姑勿論原因係乜，能夠通過分拆資產股本化，把一些隱藏價值浮現，對和黃的資產價值提升，點都係好處多於壞處。

殯儀股炒影子概念

尋日除咗新能源股外，殯儀股亦有資金追捧，安賢園（00922）及中國生命（08296）分別升17%及升16%，仁智國際（08082）亦升2%。雖然話，重陽節同西方鬼節快到，但往年呢啲時候都唔見炒作殯儀股，可見板塊異動另有原因。

其中一個可能性，乃早在五月已傳出擬來港上市、在內地經營墓園業務的福壽園，近日傳出籌備在港上市一事有進展，預料季內可正式展開招股活動，成為港股中首隻進行公開招股上市的殯儀股，不排除此前有炒家提早落場熱身，炒作相關影子股。

華創（00291）同英國超市巨頭Tesco合組合營公司，Tesco把現有在內地經營零售及房地產物業業務，加上43.25億元現金注入，交易完成後，揸合營項目兩成，Tesco有權在完成交易第五周年或者合營項目上市時，額外增持多5%股權，如果單睇現金出資，以為合營公司價值216.25億，但唔好忽略Tesco注入的「劃撥項目」，過去兩個財政年度，134間分店未經審核虧損分別達18.6億及29.96億元。

近年華創打造成零售業務主導，一一及一二年已佔整體貢獻62及70%，今年內地零售業吹淡風，零售核心收益跌4%至6.24億，仍佔整體盈利62%左右，搵英國鼎鼎大名的Tesco合作，借其較高的品牌知名度，合理之至。俗語有云猛虎不及地頭蟲，Tesco在英國威到極，海外單打獨鬥卻處處碰壁，今年初才退出勁蝕的美國業務，在中國也水土不服，如今索性搵枝盲公竹幫手。

目前華潤萬家主攻二三線城市，而Tesco的分店則集中一線城市，雙方網絡重疊程度唔大，不過要合併效益呈現，斷估都唔會係短期內嘅事，消息對華創即時刺激有限，但現價估值已偏高，再追吸引力唔大。