雖然目前全球智能手機市場幾乎由蘋果公司同三星瓜分,但近日有傳惠普(HP)打算再次落場挑戰,仲會將新機交畀比亞迪電子(00285)代工,消息令到呢隻股尋日踩油收復10日及20日線,收報3.73元,升逾7%,加埋14日RSI(54)回勇,短線若可突破50日線3.83元,阻力睇100日線4.1元,有興趣追落後的話,可以(目及)實。

比亞迪電子今年上半年營業額增長8.2%至76億元人仔,純利增長21.2%至3.17億元人仔,毛利率亦由8.95%升至10.88%,原因係高毛利的金屬部件業務快速增長,同埋贏得平板電腦訂單及移動智能終端新客戶。巴克萊亦出報告叫人買,話公司受惠移動智能終端產品外判需求增加,食正行業高增長期,而且垂直整合的生產模式更勝台灣同業,市佔率持續提升,估值有上調空間,畀佢目標價4.43元,同現價差距19%。

比亞迪電子(00285)

阻力位: 4.10元

支持位: 3.33元