雙辣招實施超過半年，工商舖物業租售成交愈來愈少，美聯工商舖（00459）都睇淡今年底前市況，其中對舖位前景最唔樂觀，估計今季本港全線街舖售價下挫，其中以二、三線街舖售價跌幅最甘，有機會插水8至10%。物業成交前景暗淡。該公司行政總裁黃漢成話，若情況惡化，會考慮將部分地舖或辦公室頂租，不過有消息話九龍東部分小型代理行已率先向租客免佣自救。

美聯黃漢成（左二）預料，本季工商舖代理流失情況將會明顯擴大。

本季工商舖物業租售價走勢預測

黃漢成（Daniel）同劉Sir呻，政府今年二月出招後，工商舖成交萎縮之餘，租售價都大插水，佢預期整體工商舖售價都會下跌，其中幾年前炒味較濃嘅商舖環境最差，依家一線街吉舖多咗好多，相信今季一線街舖成交價會跌3至6%，係近年少見，而租金跌幅更大，料會下調5%至8%。

工商廈租售齊睇淡

佢又話，二、三線街地舖無人炒，售價更加無運行，相信跌幅高達8至10%，但租金則平穩。至於工廈及商廈都唔好得幾多，租售價都會有3至10%，以及3至5%跌幅。

近排代理叫苦連天，工商舖買賣每月成交得約莫300至400宗，業界相關代理人數近6,000人，根本無得做。佢公司早排做咗多個調查，當中有62%人士認為政府應撤招，另外亦有60%人士認為政府應為措施訂下限期。

Daniel話，該公司出招後已減省約一成營業員，觀塘地舖無續租，若果樓市繼續惡化，未來會考慮將部分租金貴嘅舖或者寫字樓推出頂租。中原（工商舖）營運總監潘志明亦同劉Sir講，公司喺觀塘柏秀中心寫字樓單位已經放緊頂租，意向租金約6萬元，同依家一樣，至於九龍灣德福大廈單位亦叫頂租，意向月租維持約4萬元。有代理爆料，九龍東開始有細行頂唔順，若租客肯租工業或商廈，可以免佣。

嘉芙摸出賺千五萬

政府出招後，唔少過億元大額物業成交都轉而透過賣殼出售，慳番稅務成本，紀惠集團廖偉麟啱啱再用呢招出貨，剛減價約1,500萬元，以約1.65億元「摸上摸」售出尖沙咀嘉芙中心地下一個銀行租用地舖，揸咗個多月帳面淨袋1,500萬元。