第四季首個交易日港股高開,恒指一度重上23,000點關,惟尾市有回吐,最終收報22,984點,升124點,成交551億元。長實(00001)和黃(00013)同升逾3%,相等於恒指升40點。內地仍在休市,冇咗祖國魚缸做指標,短期都係睇美國政府預算案單鬧劇點發展,唔排除指數繼續牛牛皮皮。

經過多年業務表現低迷的中芯,上月成功配股,市場憧憬或有後續動作。(資料圖片)

假前異動的光伏股未見太大回吐壓力,保利協鑫(03800)不甘落後,尋日成交大增至9.47億元,收報2.38元,升6%;漢能太陽能(00566)股價再創五十二周新高1.49元後引發獲利回吐,收市倒跌2%,收報1.37元。其他環保股亦見異動,風電股金風科技(02208)及中傳動(00658)升5至6%;水務股北控水務(00371)及中國水務(00855)升2至3%;比亞迪(01211)及比亞迪電子(00285)分別升3%及7%。阿莊揸住的垃圾發電股新環保能源(03989)亦抽高8.7%,會繼續持有。

資金轉炒二三線股

上周提及的白雲山(00874)真係強者愈強,尋日高位見35.85元,收報35.4元,升4.2%。一路想等低位吸納的石藥集團(01093)話咁快上番4元樓上,又錯過低吸機會。市場缺乏方向,確實多咗資金轉炒二、三線股,上述新能源股異動是好例子,另見國美電器(00493)又再上番1元關,收報1.02元,升3%;好耐冇炒過的飛毛腿(01399)一度衝到上0.49元,收報0.455元,升9.6%,成交有1,611萬股。

既然呢期興冷敲二、三線股,就循呢個方向揀股,又諗起熟口熟面的中芯國際(00981),尋日收報0.55元,升5.7%,成交1.43億股。上月,有中芯股東配售5.6億股,作價0.53元。老實講,過去幾年呢隻股可以話傷盡股民心,今次配股話多唔多,話少亦唔少,要搵人接,相信都係落入少數大戶手,唔會批得好散。對於一隻長期低迷的股份,突然有配售活動,舊股抑或新股也好,反正都係唔簡單,上月下旬更有大行發報告唱好,不妨留意仲有冇消息跟尾。

過去兩周,中芯股價在0.52至0.55元徘徊,能唔能夠乘二、三線股氣氛轉熱短炒一轉,關鍵在以大成交突破50日線0.57元,成功破位下一主要阻力在0.65元水平,失守重要支持250日線0.49元宜嚴守止蝕。